Yfirlit frétta

Náttúruverndarnefnd Fljótsdalshéraðs vill benda á að skv. náttúruverndarlögum og reglugerð sem á þeim byggir er almennt óheimilt að setja upp auglýsingar meðfram vegum eða annars staðar utan þéttbýlis.

Rauði krossinn á Vopnafirði hefur verið í viðræðum um sameiningu við deildina á Héraði og Borgarfirði eystra. Stofnfundur þessarar sameinuðu deildar var haldinn á Bókakaffinu Hlöðum í Fellabæ þann 29. október.

Menningarmiðstöð Fljótsdalshéraðs stendur nú í annað sinn fyrir listviðburðinum Myrkraverk, en þessi árlegi viðburður felur í sér að listaverki er komið fyrir í forglugga Sláturhússins og mun það standa þar yfir myrkustu mánuði vetrarins.

Nú þegar farið er að dimma á kvöldin er bráðnauðsynlegt að huga að endurskinsmerkjum. Í myrkri sjást gangandi, hlaupandi og hjólandi vegfarendur illa þrátt fyrir götulýsingu og ökuljós bifreiða.

Á fundum sveitarstjórna Borgarfjarðarhrepps, Seyðisfjarðarkaupstaðar, Fljótsdalshéraðs og Djúpavogshrepps, sem haldnir hafa verið í þessari viku, hefur verið til umfjöllunar tillaga um að ganga með formlegum hætti til undirbúnings að mögulegri sameiningu þessara sveitarfélaga.

Breski sagnaþulurinn Katy Cawkwell verður á Egilsstöðum 18. og 19. október og verður með sagnakvöld og sagnamennskunámskeið í Sláturhúsinu. Katy hefur starfað sem sagnaþulur í tvo áratugi og sérhæfir sig í breskri þjóðsagnahefð. Efnið er flutt á ensku en bæði námskeiðið og frásagnarkvöldið eru hönnuð fyrir þátttakendur sem ekki hafa mikla kunnáttu í ensku.

283. fundur bæjarstjórnar Fljótdalshéraðs verður haldinn í fundarsal bæjarstjórnar miðvikudaginn 17. október 2018 og hefst hann klukkan 17:00. Hægt er að fylgjast með fundinum í beinni útsendingu á netinu með því að fara inn á vefsvæði sem heitir Bæjarstjórn í beinni. Þar er einnig hægt að skoða upptökur af síðustu fundum.

Nýverið var opnuð sýning um ævi og störf Guðrúnar frá Lundi í Safnahúsinu á Egilsstöðum. Sýningin er farandsýning en hún verður í húsinu til nóvemberloka

Mánudaginn 8. október klukkan 9 verður foreldrum nemenda í 6. og 7. bekk grunnskóla á Fljótsdalshéraði boðið upp á netöryggisfræðslu. SAFT, vakningarátak um örugga og jákvæða tölvu- og nýmiðlanotkun barna og unglinga á Íslandi, heldur námskeiðið.

Mánudaginn 8. október klukkan 20:00 býður Fljótsdalshérað foreldrum í sveitarfélaginu upp á kynningu á niðurstöðum rannsóknarinnar Hagir og líðan sem rannsóknarmiðstöðin Rannsóknir og greining leggja fyrir 8.-10. bekkinga á Íslandi á hverju ári. Unglingar eru hvattir til að mæta með foreldrum sínum.