Yfirlit frétta

Hinir árlegu tónleikar Kammerkórs Egilsstaðakirkju verða haldnir sunnudaginn 27. nóvember klukkan 17:00 í Egilsstaðakirkju. Á dagskrá eru þekktar aðventu- og jólaperlur, einsöngur og hljóðfæraleikur. Stjórnandi kórsins er Torvald Gjerde.

Dagskrá Menningarmiðstöðvar Fljótsdalshéraðs í Sláturhúsinu á aðventunni hefst með ljóðalestri – og minnt er á að síðasti dagurinn til að sjá Sögusýningu Leikfélagsins er 2. desember.

Borist hafa fréttir af því að sum símafyrirtæki hyggist taka upp gjald fyrir innskráningu á þjónustusíður með GSM símum. Af því tilefni vill Fljótsdalshérað benda á að áfram verður hægt að skrá sig inn á íbúagátt og funda- og starfsmannagátt sveitarfélagsins með íslykli og rafrænum skilríkjum á korti, íbúum og starfsmönnum að kostnaðarlausu.

Seinni ormahreinsun hunda og katta verður framkvæmd í þjónustumiðstöð Fljótsdalshéraðs að Tjarnarási 9 sem hér segir: Hundar – fimmtudaginn 24. nóvember frá kl. 16-18 Kettir – föstudaginn 25. nóvember frá kl. 16-18

Samtök iðnaðarins boða til opins fundar klukkan 15 föstudaginn 25. nóvember á Hótel Héraði á Egilsstöðum. Fjallað verður um byggingar- og mannvirkjamál, samskipti framkvæmdaaðila og embættismanna, byggingarreglugerð með nýjustu breytingum og kynningu á kostum þess að vera aðili að Samtökum iðnaðarins.

Unglingalandsmót UMFÍ verður haldið á Egilsstöðum verslunarmannahelgina 2017. Forsvarsmenn Ungmennafélags Íslands, Fljótsdalshéraðs og Ungmenna- og íþróttasambands Austurlands hittust á Egilsstöðum á þriðjudag og skrifuðu undir samning þessa efnis.

Til skrifstofu Heilbrigðiseftirlits Austurlands berast iðulega kvartanir um að hrafnar valdi ónæði á Egilsstöðum og að af þeim séu óþrif. Eitthvað er um að íbúar Fljótsdalshéraðs séu að fóðra hrafna og er það eflaust vel meint. Um villta fugla gildir almennt að ekki er æskilegt að þeir séu fóðraðir, nema í harðæri, heldur er þeim hollara að afla sér sjálfum fæðu í náttúrunni.

Leikfélag Fljótsdalshéraðs hélt upp á 50 ára afmæli sitt um helgina. Tvær sýningar voru haldnar í Valaskjálf, þar sem flutt voru lög úr nokkrum af ótal sýningum leikfélagsins. Á laugardagskvöld var Kristrún Jónsdóttir, Dúrra, heiðruð og gerð að fyrsta heiðursfélaga félagsins.

Dansleikhúsverkið FUBAR- verður sýnt í Frystiklefanum í Sláturhúsinu á Degi íslenskrar tungu 16. nóvember klukkan 17.30. Verkið er abstrakt nálgun af persónulegri upplifun höfundar af hryðjuverkaógn í Evrópu. Dansari er Sigga Soffía. Jónas Sen tónskáld frumsemur tónlistina við verkið en tónlist og dans hafa fæðst saman í spunum á vinnuferlinu þar sem listamennirnir vinna báðir útfrá sama efninu og þannig myndast djúp tenging tónlistar og hreyfinga.

Í október síðastliðnum var starf forstöðumanns Menningarmiðstöðvar Fljótsdalshéraðs auglýst til umsóknar, með umsóknarfresti til 1. nóvember 2016. Alls sóttu þrettán einstaklingar um stöðuna en einn dró umsóknina til baka. Gert er ráð fyrir að niðurstaða um ráðningu í starfið liggi fyrir upp úr miðjum nóvember.