Uppskeruhátíð á Bókasafni Héraðsbúa

Uppskeruhátíð Sumarlesturs barna á bókasafni Héraðsbúa var haldin í gær. Sumarlestur er lestrarátak fyrir börn á grunnskólaaldri, sem hófst 2. júní og lauk 23. ágúst. 61 barn, á aldrinum frá 6 til 12 ára, tók þátt í sumarlestrinum. Sum lásu eina bók en flest tóku mun fleiri og var Mekkín Ann Bjarkadóttir stórtækust og las 37 bækur. Allir sem tóku þátt fengu viðurkenningaskjal og örlítinn glaðning. Nöfn fimm þátttakenda voru dregin úr lukkupottinum og fengu þeir bókaverðlaun. Þá fengu þrjár stúlkur sem lásu flestar bækurnar aukaverðlaun, fallega stílabók svo þær geti byrjað að skrifa eigin sögur.

Bókasafnsstarfsmenn þakka öllum krökkum sem tóku þátt í sumarlestrinum skemmtilega samvinnu í sumar.

Þau börn sem ekki gátu komið í gær geta nálgast viðurkenningarskjölin næst þegar þau koma á bókasafnið.