Örninn kominn í leitirnar

Tréskúlptúrinn Örninn, sem stolið var af stalli sínum við Fagradalsbraut á Egilsstöðum í byrjun síðustu viku, er kominn í leitirnar.

Eftirgrennslan lögreglu leiddi til þess að erninum var „skilað“ nokkrum dögum síðar. Hann fannst þá við þjóðveg 1, við hringtorg á Kirkjubæjarklaustri. Hann er nú í vörslu lögreglunnar á Suðurlandi og bíður heimferðar.

Skemmdir urðu á stöplinum sem Örninn sat á en verkið sjálft er talið óskemmt.

Lögreglan telur um „bernskubrek“ fullorðinna hafi verið að ræða en verkið er um 70 cm á hæð og um 50 kg að þyngd.
Það var gert af Grétari Reynissyni en er í eigu Fljótsdalshéraðs. Málið er enn í rannsókn.