Leikskólabörn heimsóttu bæjarskrifstofurnar

Í tilefni af Degi leikskólans heimsóttu elstu börnin í leikskólanum Tjarnarskógi ásamt starfsmönnum bæjarskrifstofur Fljótsdalshéraðs og þar tók bæjarstjóri á móti hópnum í fundarsal bæjarstjórnar.

Bæjarstjóri sagði þeim frá starfi bæjarstjórnar og vakti fundarhamarinn sem notaður er til að setja og slíta fund sérstaka athygli þeirra og mörg þeirra fengu að prófa hamarinn.

Bæjarstjóri fékk fyrirspurnir frá börnunum, m.a. um hvað bæjarstjóri gerði auk þess sem þau bentu á ýmislegt sem þau teldu að þyrfti að lagfæra eða betrumbæta. M.a. töluðu þau um gangstéttarbrúnir sem þyrfti að mála og bentu á hvar vantaði leikvöll, auk þess sem þyrfti að gera við fánastöngina við leikskólann.

Hópurinn hafði með sér hljóðfæri sem þau höfðu sjálf gert og sungu við undirleik eigin hljóðfæra nokkur vel valin lög fyrir starfsfólkið á bæjarskrifstofunni, sem þakkar börnunum og starfsfólkinu kærlega fyrir skemmtilega heimsókn.