Fitan í flöskur

Á 40. afmælisári sínu, á síðasta ári, setti Hitaveita Egilsstaða og Fella af stað langtímaverkefni sem í felst að hvetja íbúa til að setja ekki fitu og olíur í fráveitukerfi sveitarfélagsins. Öllum íbúum standa því til boða, án endurgjalds, söfnunartrektar með loki til að skrúfa á einnota plastflöskur, en í þær má setja fituna og olíur. Þegar flöskurnar eru fullar má skila þeim á móttökustöð.

Ávinningurinn er mikill, því hverskonar fita sest í lagnakerfi, bæði heimæða á lóðum sem húseigendur eiga og götulagna í umsjá HEF. Þá er mikið unnið með því að minnka magn fitu í hreinsistöðvum þar sem hún þránar fljótt og lyktar illa.

Hitaveita Egilsstaða og Fella vonast til að íbúar verðir virkir fitusafnarar og leggist á eitt við að minnka viðhaldskostnað fráveitukerfisins, til hagsbóta fyrir umhverfið, með möguleikanum á að úr afgangsfitunni verði unnin lífdísill í samstarfi við Vistorku.

Íbúar geta nálgast trektarnar á skrifstofu HEF, Einhleypingi 1, Fellabæ og í Húsi handanna, Miðvangi 1-3, Egilsstöðum.