Vinnuskólinn að hefja starfsemi sína

Þessa dagana stendur yfir undirbúningur fyrir vinnuskóla Fljótsdalshéraðs en fyrstu nemendurnir mæta til vinnu 6. júní. Dagur Skírnir Óðinsson verður verkstjóri vinnuskólans í sumar en Freyr Ævarsson sem gegnt hefur því starfi undanfarin sumur er í fæðingarorlofi.  „Mér líst mjög vel á komandi sumar, við erum með topp flokkstjóra og það eru duglegir árgangar að koma inn í ár", segir Dagur sem er nýmættur til vinnu.

Umsóknir um störf hjá vinnuskólanum eru óvenju fáar í ár. „Undanfarin ár hafa verið mun fleiri unglingar í vinnuskólanum en verða í sumar. Þetta eru flottir árgangar svo það kemur mér ekki á óvart hversu margir þeirra hafi dottið í vinnu hjá fyrirtækjum í sveitarfélaginu. Eins segir þetta mér að atvinnuástandið hljóti að vera gott hér á Fljótsdalshéraði, svo það er bara flott," sagði Dagur að lokum.

Nemendur mega búast við að fá staðfestingu um vinnu í dag, mánudag, eða á morgun, inn á Íbúagáttinni, en allir nemendur fá vinnu á þeim tíma sem þeir óskuðu eftir.