Viltu læra að sauma öskupoka?

Þegar grunnatriðum er náð má halda áfram og gera öskupokana svona fallega.

Minjasafn Austurlands og Bókasafn Héraðsbúa í samstarfi við Soroptimistaklúbb Austurlands, bjóða upp á öskupokasmiðjur dagana 12. og 13. febrúar á Bókasafninu.

Sá alíslenski siður að hengja öskupoka á fólk á öskudaginn á líklega rætur að rekja aftur í kaþólskan sið. Sumir telja siðinn á undanhaldi en þó eru alltaf einhverjir sem leggja mikið á sig til að láta aðra ganga um með öskupoka á baki. Minjasafnið, Bókasafnið og Soroptimistaklúbbur Austurlands leggja sitt af mörkum til að viðhalda þessari skemmtilegu hefð og bjóða upp á öskupokasmiðjur á Bókasafninu á bolludag og sprengidag.

Smiðjurnar verða opnar frá kl. 15:00-17:00 báða dagana. Boðið verður upp á efni, áhöld, fróðleik og leiðsögn frá félagskonum í Soroptimistaklúbbnum.

Tilvalið að líta við, ná sér í lesefni og sauma eins og einn öskupoka með börnunum í leiðinni.

Notaleg fjölskyldusamvera og þjóðlegar hefðir.