Umhverfisvænn og Grænn apríl

Á bæjarstjórnarfundi þann 6. apríl var einróma samþykkt tillaga frá umhverfis- og héraðsnefnd um að sveitarfélagið vekti athygli á verkefninu „Grænn apríl“ og hvetti alla í sveitarfélaginu, íbúa og fyrirtæki, að kynna sér verkefnið og taka þátt í því. Samtökin Grænn apríl voru stofnuð nýverið til að hvetja fólk til að vinna saman til að gera apríl að „grænum mánuði“.

Aprílmánuður var kjörinn því þá er náttúran að vakna til lífs, dagur jarðar er 22. apríl og hinn íslenski Dagur umhverfisins er 25. apríl. Þá er kjörið að koma af stað umhverfisvænum verkefnum, kynna þau umhverfisverkefni sem þegar eru í framkvæmd og kynna vöru, þekkingu og þjónustu sem snýr að grænni og sjálfbærri framtíð. Nánari upplýsingar um verkefnið er að finna á Graennapril.is.