Sundlaugin á Egilsstöðum

Sundlaugin á Egilsstöðum er vinsæl hjá ferðamönnum jafnt sem heimamönnum.  Þar hefur aðsóknin verið frekar dræm það sem af er sumri en undanfarna daga hefur hún þó verið að aukast.  Á laugardaginn var mjög fjölmennt enda veðrið gott. 
Í gær kom hópur frá sumarbúðunum á Eiðum í sund, í allt 70 manna hópur og var, að sögn starfsmanna, mikið fjör hjá þeim.  Töluvert er um að Fjarðabúar komi í sundlaugina, kvarta sáran undan því hve þokan hefur verið þrálát þar undanfarið og einnig eru gestir í sumarhúsum á svæðinu duglegir að nýta sér þjónustu sundlaugarinnar. 
Á fimmtudögum koma ferðamennirnir úr Norrænu gjarnan við og  fara í sund.  Þeir verða oft undrandi yfir verðinu, enda aðgangur í sundlaugar víða í Evrópu mun dýrari en hér á Íslandi.
Aðstaða í sundlauginni er orðin mjög góð.  Í vetur voru búningsklefar lagfærðir, settir upp læstir skápar og gólfefni og innréttingar endurnýjað.  Við sundlaugina eru heitir pottar, barnalaug, rennibraut og auðvitað sólbekkir á bökkum laugarinnar.
Sundlaugin á Hallormsstað  er einnig opin, en rekstur hennar er í höndum einkaaðila.