Strengjamót á Egilsstöðum um helgina

Tónlistarskólinn á Egilsstöðum heldur strengjamót um helgina. Nemendur á strengjahljóðfæri af öllu landinu koma í Egilsstaði og ljúka helginni með tónleikum í skólanum á sunnudag.

Dagana 14. til 16. október heldur Tónlistarskólinn á Egilsstöðum strengjamót. Nemendur á strengjahljóðfæri (fiðlu, víólu, selló og kontrabassa) af öllu landinu mæta og eiga góða helgi saman við leik og störf.

Strengjamót eru haldin á um það bil tveggja ára fresti og er þetta í fyrsta sinn sem það er haldið á Austurlandi. Von er á um 80 nemendum og 30 kennurum, foreldrum og fararstjórum. Æft verður í þremur sveitum eftir aldri og getu og mótinu lýkur með tónleikum í Egilsstaðaskóla sunnudaginn 16. október kl. 13.00.

Það er mikil tilhlökkun í nemendum og þeim sem halda utan um mótið. Svona mót eru alltaf mjög skemmtileg og þarna verða til ógleymanlegar minningar. Allir eru velkomnir á tónleikana í lokin og aðgangur er ókeypis á þá.