Skrifað var undir samstarfssamning Fljótsdalshéraðs og Skátafélagsins Héraðsbúa í dag. Samningurinn byggir á farsælu og nánu samstarfi samningsaðila til nokkurra ára og mótar samskipti þeirra til framtíðar.
Í samningunum felst meðal annars að skátafélagið Héraðsbúar hafi endurgjaldslaus afnot af Skátalundi í Selskógi og hafi leyfi fyrir nokkrum framkvæmdum þar. Einnig hafi félagð afnotarétt af félagsaðstöðu í Ný-Ung í samráði við forstöðumann félagsmiðstöðva Fljótsdalshéraðs.
Þá er félaginu tryggt 250.000 króna rekstrarframlag á árinu en á móti því kemur að skátafélagið skuldbindi sig til að vera virkur þátttakandi í hátíðum á vegum sveitarfélagsins eins og 17. júní og Ormsteiti.
Samningurinn gildir til tveggja ára frá undirskrift og verður framlag til rekstursins endurskoðað árlega.
Á myndinni eru Björn Ingimarsson bæjarstjóri og Óðinn Gunnar Óðinnsson, atvinnu-, íþrótta- og menningarfulltrúi Fljótsdalshéraðs, ásamt Þórdísi Kristvinsdóttur og Margrét Sigbjörnsdóttur sem undirrituðu fyrir hönd skátanna.