Skólar á Héraði standa sig vel í nýsköpunarkeppni

Tvær hugvitskonur, þær Sigríður Tinna Sveinbjörnsdóttir og Þorgerður María Þorbjarnardóttir, nemendur Egilsstaðaskóla, unnu til verðlauna í Nýsköpunarkeppni grunnskólanna (NKG). En lokhóf keppninnar fór fram í gær hjá aðal bakhjarli keppninnar, Marel í Garðabæ. Þá hlaut Brúarásskóli önnur verðlaun fyrir hlutfallslega flestar hugmyndir í NKG  og fyrir störf sín á sviði nýsköpunarmenntar.

Keppnisflokkarnir voru sjö talsins í ár; Almennur flokkur, atvinnuvegir, hugbúnaður, hönnun, slysavarnir, leikföng og orka og umhverfi.

Sigríður Tinna Sveinbjörnsdóttir, nemandi í 10.bekk Egilsstaðaskóla, sigraði í flokki hugbúnaðar og hlaut önnur verðlaun í flokki hönnunar. Þorgerður María Þorbjarnardóttir vann önnur verðlaun í hugbúnaðarflokki, en hún er einnig nemandi í 10.bekk Egilsstaðaskóla.

Sigríður Tinna hlaut svonefndan Guðrúnarbikar fyrir framúrskarandi störf í vinnusmiðju NKG 2010. Bikarinn var nú afhentur í fyrsta sinn, til heiðurs Guðrúnar Þórsdóttur heitinnar. Guðrún var ein af upphafsaðilum Nýsköpunarkeppni grunnskólanemenda og vann ómetanlegt starf í þágu nýsköpunarmenntar.

Forseti Íslands, hr. Ólafur Ragnar Grímsson verndari keppninnar, afhenti verðlaun og flutti hátíðarávarp. Mennta- og menningarmálaráðherra Katrín Jakobsdóttir, afhenti viðurkenningarskjöl til þátttakenda og grunnskóla.

Á síðasta ári hófst átak í skólum Fljótsdalshérað til að efla nýsköpunarmennt á öllum skólastigum. Þessi góði árangur í NKG er nemendum og kennurum á Héraði hvatning til frekari dáða.