Rafbókasafnið komið austur

13 almenningsbókasöfn fengu aðgang að rafbókasafninu þann 1. júní

Bókasafn Héraðsbúa býður nú lánþegum sínum aðgang að Rafbókasafninu. Þar er hægt að nálgast raf- og hljóðbækur á erlendum tungumálum. Lánþegi þarf að hafa gilt bókasafnskort hjá bókasafninu, aðgangsorð og PIN-númer sem fæst auðveldlega við heimsókn á safnið.

Í Rafbókasafninu er hægt að velja hvort bók er tekin að láni í 7, 14 eða 21 dag. Bók sem hefur verið tekin að láni skilast sjálfkrafa að lánstíma liðnum og því er engin hætta á dagsektum. En það er líka hægt að skila fyrr.

Annars eru leiðbeiningar og upplýsingar um Rafbókasafnið að finna hér og á vef Borgarbókasafns en Borgarbókasafnið reið á vaðið og hóf útlán á rafbókum í janúar. 13 bókasöfn fengu aðgang að Rafbókasafninu þann 1.júní og í haust stendur öllum almenningsbókasöfnum í Gegni til boða samstarf við safnið. 

Allir geta skoðað hvað er að finna í Rafbókasafninu þó þeir séu ekki skráðir inn en til að fá bók lánaða verður viðkomandi að vera með aðgang.