Plastlaus september 2018

Þessir skemmilegu taupoka saumaði góður Rauðakrosssjálfboðaliði og notaði í þá úr sér gengna boli. Vel við hæfi að nota slíkt í stað plastpoka.

Plastlaus september er árlegt árvekniátak sem miðar að því að vekja landsmenn til umhugsunar um plastnotkun, þann plastúrgang sem fellur til á heimilum og vinnustöðum og þá ofgnótt plasts sem er í umhverfinu.

Fólk er hvatt til að taka þátt í Plastlausum september með því að taka stór eða smá skref í áttina að því að draga úr notkun á einnota plasti til framtíðar.
Plast endist í þúsundir ára og er því slakur kostur t.d. fyrir stök not. Þá brotnar plast niður á mjög löngum tíma og þá í örplast sem er slæmt fyrir umhverfið. Plast er eingöngu hægt að endurvinna í annað plast af lélegri gæðum. Allt plast sem við notum og fer ekki til endurvinnslu, safnast fyrir á urðunarstöðum eða í nátturunni og veldur þar skaða um ókomna tíð. Plast endar allt of oft í náttúrunni, og þá sérstaklega í ám, vötnum og sjó. Plast dregur til sín ýmis mengunarefni og þegar það endar í vef lífvera geta efnin þar með endað í fæðu okkar. Mjúkplast inniheldur stundum hormónaraskandi efni (t.d. þalöt) sem eru skaðleg mannfólki.

Það sem við getum gert til að minnka plastnotkun er m.a.
- Skila öllu plasti í endurvinnslu.
- Nota margnota poka, pappakassa, bakpoka eða annað slíkt þegar verslað er.
- Velja snyrtivörur sem lausar eru við plastefni.
- Velja sápur og þvottaefni í pappaumbúðum.
- Afþakka rör.
- Pakka nesti og afgöngum í margnota box og krukkur.

Upplýsingarnar hér fyrir ofan eru teknar af heimasíðunni Plastlaus september. Þar er hægt að lesa allt um verkefnið og hvað er hægt að gera til að minnka sína plastnotkun.