Pantið áhrifin frá Móður Jörð hlaut nýsköpunarverðlaun

Verkefnið Pantið áhrifin frá Móður Jörð hlaut í gær nýsköpunarverðlaun forseta Íslands. „Pantið áhrifin er hugmyndafræðilegur veitingastaður þar sem upplifun, fræðsla og umhverfisvitund fara saman. Sérstaða staðarins er hin óvænta framsetning á réttunum, sjálfbærni og færanleiki hans en þar verða réttir pantaðir eftir áhrifum þeirra á líkamann. Verkefnið verður unnið á eins náttúrumeðvitaðan hátt og mögulegt er og áhersla lögð á íslenska og heiðarlega framleiðslu." Þetta segja höfundar verkefnisins um hugmynd sína.

Hugmyndin kviknaði haustið 2009 í áfanga við Listaháskóla Íslands sem kallast Stefnumót hönnuða og bænda þar sem vöruhönnunarnemar og bændur unnu saman í hópum að nýsköpun og verðmætaaukningu íslensks landbúnaðar.

Hugmyndin að veitingastaðnum byggir á hugmyndafræði Eymundar Magnússonar bónda að Vallanesi en hann sérhæfir sig í framleiðslu lífrænna matjurta sem seldar eru undir vörumerkinu Móðir Jörð. Eymundur leggur metnað sinn í að fræða almenning um mikilvægi heilbrigðrar fæðu og áhrif hennar á líkama okkar ásamt því að stuðla að sjálfbærni og náttúruvernd. Staðbundin framleiðsla og vistvænt hráefni verða aðalsmerki veitingastaðarins. Staðurinn sjálfur er byggður úr timbri úr Hallormsstaðarskógi (10 km frá Vallanesi) og réttirnir búnir til úr íslensku hráefni, mestmegnis frá Vallanesi. Kappkostað var að nota eins nærtækan efnivið og völ var á og margar vettvangsferðir farnar í leit að möguleikum á hráefni og vinnslu. Staðurinn er sampakkanlegur og getur því ferðast milli landshorna eftir því hvernig vindar blása.

Verkefnið var unnið af þeim Auði Ösp Guðmundsdóttur, vöruhönnun LHÍ, Robert Petersen, Furniture Design, Götenburg University, Katharina Lötzsch, vöruhönnun LHÍ, Emblu Vigfúsdóttur, vöruhönnun LHÍ. En leiðbeinandi var Brynhildur Pálsdóttir.