Nýtt hjúkrunarheimili í gagnið fyrir 2015

Á fundi í Gistihúsinu á Egilsstöðum í síðustu viku var undirritaður samningur á milli Fljótsdalshéraðs og ríkisins um að byggja 40 rýma hjúkrunarheimili á Egilsstöðum. Þetta er framkvæmd upp á rúman einn milljarð króna sem gert er ráð fyrir að skapi nokkur umsvif á framkvæmdartímanum auk þess að bæta þjónustu við aldraða frá því sem nú er (18 hjúkrunarrými í dag) og fjölga umönnunar- og þjónustustörfum í sveitarfélaginu.

Gert er ráð fyrir að sjö hönnunarteymi sem taka þátt í samkeppni um hönnun heimilisins skili af sér tillögum 20. maí 2012 og er horft til þess að val á hönnuði geti legið fyrir um miðjan júní. Stefnt er að því að bjóða verkið út fyrir lok árs og gangi áætlanir eftir á að vera hægt að hefja framkvæmdir í byrjun árs 2013 og ljúka þeim og taka heimilið í notkun seinni hluta árs 2014.