Nýr prestur skipaður í Egilsstaðaprestakalli


Biskup Íslands hefur skipað Sigríði Rún Tryggvadóttur guðfræðing í embætti prests í Egilsstaðaprestakalli, Austurlandsprófastsdæmi frá 1. ágúst 2013. Umsóknarfrestur rann út 26. júní og voru sjö umsækjendur um embættið. Tíu manna valnefnd prestakallsins mælti með því að Sigríður Rún væri skipuð í embættið.

Sigríður Rún er fædd í Reykjavík 1975. Hún lauk cand.theol. prófi frá guðfræðideild HÍ 2003 og hefur undanfarin ár sinnt ýmsum störfum á sviði barna- og æskulýðsmála. Hún var æskulýðsfulltrúi í Fella- og Hólakirkju 2004-2009, verkefnastjóri Lífsleikni Þjóðkirkjunnar 2009-2011 og æskulýðsfulltrúi í Árbæjarkirkju 2009-2011.
Þá var hún skólastjóri Farskóla leiðtogaefna á höfuðborgarsvæðinu 2011-2013.

Frá árinu 2011 hefur hún starfað sem framkvæmdastjóri Æskulýðssambands þjóðkirkjunnar.

Frétt og mynd er tekin af vefnum kirkjan.is