Náttúrumæraskráin í nýjan búning

Tengil á náttúrumæraskrána má m.a. finna undir flipanum mannlíf á vefsíðu Fljótsdalshéraðs.

Nýlega var vefsíðan Náttúrumæraskrá Fljótsdalshéraðs færð í nýjan og aðgengilegri búning. Náttúrumæraskrána tók Helgi Hallgrímsson náttúrufræðingur á Egilsstöðum saman fyrst árið 1998 í tengslum við gerð svæðisskipulags og endurskoðaði hana síðan 2007-2008 í tengslum við gerð aðalskipulags fyrir Fljótsdalshérað.

Í skránni eru lýsingar á um 600 stöðum og svæðum sem Helgi telur sérstaklega athyglisverð og kallar náttúrumæri. Þar lýsir hann landslagi og örnefnum auk annarra atriða í náttúrufari Fljótsdalshéraðs, svo sem plöntum, fuglum og fiskum. Skrá Helga er mjög skipulega fram sett.

Öllu Héraðssvæðinu er skipt í 13 undirsvæði sem aftur skiptast í griðlönd en þar hefur Helgi tengt saman nálæga staði og svæði. Hægt er að skoða Náttúrumæraskrána hér.