Móðir Jörð hlaut Fjöreggið 2015

Myndin er tekin af vef Matvæla- og næringarfræðafélags Íslands.

Fjöregg MNÍ 2015 var afhent á Matvæladaginn sem haldin var í október en verðlaunin eru veitt fyrir lofsvert framtak á matvæla- og næringarsviði. Ragnheiður Héðinsdóttir, forstöðumaður matvælasviðs Samtaka iðnaðarins, afhenti fjöreggið við hátíðlega athöfn. Að þessu sinni hlaut Móðir Jörð verðlaunin. Verðlaunagripurinn er íslenskt glerlistaverk, sem táknar Fjöreggið og hefur verið gefið af SI frá upphafi, í yfir 20 ár.

Undirbúningsnefndinni bárust margar tilnefningar fyrir veitingu Fjöreggsins, fyrirtæki, framleiðsluvörur, upplýsingaveitur um matvæli og næringu og einstaklingar.

Í ár voru fimm tilnefndir til Fjöreggsins 2015
1. Matur og drykkur“, nýlegur veitingastaður en þar eru íslenskar matarhefðir kynntar á nýstárlegan hátt.
2. Búrið, Eirný Sigurðardóttir: Fyrir skemmtilega og nýstárlega nálgun á íslenska sælkeramarkaðnum.
3. Skólar efh (Ólöf Kristín Sívertsen): Fyrir að hafa heilsueflingu að leiðarljósi við rekstur leikskóla.
4. Skaftafell Delicatessen, Klaus Kretzer, sem framleiðir sælkeravörur úr kindakjöti úr Öræfum.
5. Og loks verðlaunahafinn Móðir Jörð, Eygló Björk Ólafsdóttir, en Móðir Jörð var tilnefnd fyrir ræktun og vöruþróun afurða úr jurtaríkinu á lífrænan hátt.