Jón Bjarki sigraði í sönglagakeppni Ormsteitis

Sönglagakeppni Ormsteitis fór fram í Valaskjálf fimmtudagskvöldið 19. ágúst. Það voru 12 lög sem bárust keppninni að þessu sinni en þetta er í fyrsta skipti sem sönglagakeppni Ormsteitis fer fram. Húsið var fullt og fólk á öllum aldri sem sótti viðburðinn. Höfundar laganna náðu líka yfir í það minnsta tvö kynslóðabil og bæði voru mæðgin sem áttu lög í keppninni sem og feðgar. Þegar úrslit voru tilkynnt kom það fram hjá formanni dómnefndar, Þórhalli Þorvaldssyni, að einhugur hafi verið með þrjú efstu sætin. Hann sagði að bæði hefðu dómnefndarfulltrúar, sem voru ásamt honum þau Aðalheiður L. Borgþórsdóttir og Torvald Gjerde og áheyrendur í sal, verið sammála en áheyrendur gátu haft áhrif á úrslitin með þátttöku í símakosningu.

Sigurvegari keppninnar í var Jón Bjarki Stefánsson með lagið „Nú er ég kominn heim" en hann samdi bæði lag og texta ásamt því að flytja lagið sjálfur. Í öðru sæti var Björk Sigbjörnsdóttir með lagið Hughrif sem hún flutti ásamt systur sinni Láru Heiði Sigbjörnsdóttur. Í þriðja sæti var svo lag eftir Björn Hafþór Guðmundsson með texta eftir Hrönn Jónsdóttur sem Guðmundur R. Gíslason flutti. Það var Hafþór Valur Guðjónsson sem átti hugmyndina að keppninni og var hann einnig hljómsveitarstjóri kvöldsins ásamt því að sjá um útsetningar laganna. Aðal styrktaraðili keppninnar í ár var Samkaup. Farandgripur var veittur fyrir fyrsta sætið sem er Harpa útskorin í tré en það var Hlynur Halldórsson frá Miðhúsum sem gerði gripinn. Aðrir styrktaraðilar sem gáfu gjafir voru Gistihúsið Egilsstöðum, Vaskur, Tónabúðin og Hafþór Valur Guðjónsson.

Myndina tók Aðalsteinn Sigurðsson af Jóni Bjarka Stefánssyni.