Íris Lind verður fræðslufulltrúi MMF

Íris Lind Sævarsdóttir verður fræðslufulltrúi MMF og hefur störf 15. ágúst.

Íris Lind Sævarsdóttir hefur verið ráðin í stöðu fræðslufulltrúa Menningarmiðstöðvar Fljótsdalshéraðs, MMF. Um er að ræða nýja stöðu við miðstöðina til eins árs, en hlutverk fræðslufulltrúa er að vinna og þróa fræðsluverkefni fyrir miðstig grunnskólanna á Austurlandi í samræmi við aðalnámsskrá grunnskóla.
Fræðslufulltrúi skal einnig vinna að samstarfi við Menntaskólanum á Egilsstöðum og aðrar menntastofnanir á Austurlandi. Fræðslufulltrúi er tengiliður MMF við menntastofnanir á landsvísu.

Fræðslufulltrúi skipuleggur og tekur á móti skólum og öðrum hópum sem heimsækja sýningar og viðburði á vegum MMF. Fræðslufulltrúi tekur einnig þátt í daglegum rekstri MMF, svo sem umsjón með Sláturhúsi, Menningarsetri, vinnustofum og listamannaíbúð. Fræðslufulltrúi heyrir undir forstöðumann MMF og vinnur í samræmi við áherslur og hlutverk miðstöðvarinnar sem er fyrst og fremst að bjóða upp á og efla lista- og menningarstarf.

Íris Lind er með B-Ed í myndlist frá K.H.Í og MA-fine art frá Winchester School of Art, Southampton University. Íris Lind starfaði sem skrifstofustjóri Fræðslunets Austurlands frá 2001 til 2004, umsjónar-, sér- og myndlistarkennari við Egilsstaðaskóla 2004 til 2015. Síðasta vetur var hún brautarstjóri listabrautar Menntaskólans á Egilsstöðum ásamt því að sinna þar listkennslu.

Alls sóttu 6 manns um stöðuna en tveir drógu umsóknina til baka. Íris Lind hefur störf 15. ágúst næstkomandi.