Hjálpumst að í umferðinni

Það er nægur snjór á Egilsstöðum þessa dagana

Þegar snjóar líkt og gert hefur síðustu daga er bráðnauðsynlegt að við hjálpumst öll að í umferðinni. Skyggni er gjarnan slæmt, háir skaflar og veggir hafa myndast víða og aðstæður verða þannig að ekki er alltaf hægt að stöðva ökutæki á augabragði eða bregðast hratt við. Eins eru gangstéttar ekki alltaf ruddar um leið og göturnar, sem kallar á aukinn fjölda gangandi vegfaranda á götunum. 

Því er gott fyrir okkur að huga að einu og öðru þegar við ferðumst um götur sveitarfélagsins, ekki síst innanbæjar.

• Ökum varlega og höfum varann á.
• Virðum hraðatakmarkanir, það er alltaf mikilvægt en sérstaklega þegar aðstæður eru ekki góðar.
• Höfum augun opin fyrir gangandi vegfarendum og börnum að leik.
• Leggjum bílum í þar til gerð stæði, ekki á gangstéttar og göngustíga.
• Notum endurskinsmerki.
• Minnum börnin okkar á umferðarreglurnar.

Hjálpumst að í vetur.

Stýrihópur Heilsueflandi samfélags á Fljótsdalshéraði