Frétt um frárennslismál á Fljótsdalshéraði

Vegna fréttar í tíufréttum RÚV 21. nóvember síðastliðinn, þar sem fram kom að engin skólphreinsun fari fram í sveitarfélaginu, vill bæjarráð árétta að sú frétt er ekki sannleikanum samkvæmt þar sem skólphreinsun er til staðar fyrir þéttbýlið á Fljótsdalshéraði og hefur verið um árabil.

Flestar útrásir fráveitunnar eru með sérstökum hreinsivikjum sem hreinsa skólpið áður en því er veitt í viðtaka. Þær útrásir sem ekki er komið hreinsivirki við, eru með rotþróm sem eru tæmdar reglulega. Varðandi fráveitumál í dreifbýli voru settar upp rotþrær við öll lögbýli, sem hreinsaðar eru með reglubundnum hætti. 

Það að áformað er að fara í frekari framkvæmdir við fráveitukerfi sveitarfélagsins á næstu árum, ber því ekki að túlka svo að engin hreinsun sé til staðar, heldur er verið að tengja saman útrásir og koma málum í enn betra horf til framtíðar litið.

Bæjarstjórn áréttar að óheppilegt er þegar fjölmiðlar draga rangar ályktanir af sínum heimildum og fara beinlínis rangt með í sínum fréttaflutningi. Það hefur löngum gengið illa að fá slík mistök leiðrétt, þannig að réttar upplýsingar komist til landsmanna.