Framkvæmdir á Hallormsstað

Í sumar eru ýmsar framkvæmdir á vegum sveitarfélagsins á Hallormsstað.  Á vormánuðum var gert átak í að lagfæra sundlaugina og koma henni í lag, þannig að unnt væri að kenna nemendum Hallormsstaðaskóla sund.

Gistiheimilið Grái hundurinn hefur síðan tekið rekstur hennar að sér í sumar.  
Verið er að mála Hallormsstaðaskóla að utan og mikil stakkaskipti að verða á útliti þessa fallega húss.  Málararnir vekja einnig mikla eftirvæntingu hjá leikskólabörnunum, en leikskólinn á Hallormsstað er nú í fyrsta skipti starfræktur yfir sumarmánuðina.
Verið er að að undirbúa malbikun á götunum Réttarkambi og Fjósakambi og eru verktakar mættir á staðinn með tækin.  Á stærstum hluta Fjósakambs er gömul klæðning, en Réttarkambur var lagður sumarið 2004.  Við þá götu standa þrjú hús og eru íbúar orðnir langeygir eftir varanlegu slitlagi á götuna.  Sama má segja um íbúana í innsta húsinu við Fjósakamb, sem fluttu inn í hús sitt haustið 1992 og hafa enn ekki fengið malbik að lóðarmörkum.