Forvarnadagurinn 2019

Ár hvert er haldinn Forvarnadagurinn að frumkvæði forseta Íslands og er markmið dagsins að vekja athygli á mikilvægum þáttum í forvarnastarfi sem snúa að ungu fólki. Í ár er dagurinn haldinn í 14. sinn í grunnskólum landsins og í níunda sinn í framhaldsskólum.

Á forvarnadaginn, sem er í dag  2. október,  ræða nemendur um hugmyndir sínar og tillögur að samverustundum með fjölskyldu og æskulýðs- og íþróttastarf, en þetta tvennt eru lykilþættir þegar kemur að forvörnum gegn hvers kyns vímuefnanotkun. Í ár gefst nemendum í 9. bekkjum grunnskóla og á fyrsta ári í framhaldsskólum tækifæri til að taka þátt í stuttmyndakeppni. 

Í ár er einnig gott að muna og minnast á það hversu góður árangur hefur náðst í forvörnum. Sem dæmi má nefna að fyrir rúmum 20 árum sögðust 42% nemenda í 10. bekk hafa neytt áfengis síðustu 30 daga en árið 2019 var talan komin í 6% og árið 2018 höfðu 46% nemenda í framhaldsskólum aldrei orðið ölvaðir.

Á vef Embætti landlæknis er að finna staðreyndablað um forvarnir í skólum sem vert er að vinna með þegar kemur að forvörnum en forvarnir eru samvinna samfélagsins í heild.