„Enn er líf í Láka“

Mikil umræða var í vetur í fjölmiðlum um dauða lífríkisins í Lagarfljóti og voru heimamenn jafnvel búnir að kaupa þessar fréttir án athugasemda.

Síðustu viku hafa verið mikil hlýindi á Austurlandi og vatnsborð Lagarfljóts hækkað mikið eins og venja er í vorleysingum. Þá flæðir jafnan upp í kíla og upp á tún neðan við Finnstaðabæina og hafa bændur þá oft hent netstubb í kílana og veitt sér svokallaða  „túnfiska“  í matinn.  Um helgina var þetta gert, þó illa væri spáð fyrir um aflabrögð.  Þau reyndust hins vegar með besta móti og veiddust margir „túnfiskar“ sem flestir voru um og yfir tvö pund. 

Á meðfylgjandi myndum má sjá sýnishorn af aflanum og glaðbeittan veiðimann, Hafdísi Önnu Svansdóttur, með góðan feng, sem vonandi er þó ekki „síðasti golþorskurinn“ eins og sungið var um hér forðum.

 

tunfiskar finnstadir