Egilsstaðaskóli og umhverfissvið Fljótsdalshéraðs í samstarfi

Grindverkin sem nemendurnir skreyta mynda skjól fyrir plöntur sem eiga eftir að vaxa upp og verða falleg garðtré.

  Sú hefð hefur skapast í Egilsstaðaskóla að nemendur 7.bekkjar gera grindverk sem nýtt eru til að skreyta leiðina úr skólanum yfir í íþróttahúsið.
Nú eru þessu grindverk orðin 5 talsins og í hverju hólfi hefur verið plantað garðtré sem á eftir að vaxa upp og fylgja nemendum um ókomna tíð. Verkefnið hefur verið unnið í samvinnu við umhverfissvið Fljótsdalshéraðs sem sér um að planta tré hverju sinni og setja niður undirstöður fyrir grindverkið. Nemendur vinna síðan hver og einn eina spýtu í grindverkið.

Í ár var svo komið að okkur þótti ástæða til að endurvinna fyrsta grindverkið, enda orðið 5 ára gamalt og farið að láta á sjá. Hópurinn fór því galvaskur og skrúfaði niður spýturnar sem fyrir voru og grunnuðu upp á nýtt til að endurvinna í grindverkið.

Þema ársins var flóra Íslands og valdi hver nemandi sér eina plöntu úr flóru Íslands og var nafnið ásamt teikningu af plöntunni sett upp á spýtu. Þarna fengu nemendur tækifæri til að skoða hvaða plöntur tilheyra flóru Íslands og kynna sér einstaka plöntur og plöntuhluta nánar. Spýturnar voru síðan skrúfaðar upp á ný í góða veðrinu í síðustu viku.

Hægt er að skoðað listaverkin sem eru meðfram göngustígnum frá íþróttamiðstöðinni á Egilsstöðum upp að Egilsstaðaskóla.