Dagur barnsins á Fljótsdalshéraði á sunnudaginn

Fjölskyldu- og frístundasvið Fljótsdalshéraðs vekur athygli á því að á  Fljótsdalshéraði hefur verið frítt í sund fyrir börn á leik- og grunskólaaldri allt síðast liðið ár. Í tilefni af Degi barnsins vill sveitarfélagið gera enn betur og býður öllu fjölskyldufólki frían aðgang að sundlauginni þann dag.

Jafnframt býður Menningarmiðstöð Fljótsdalshéraðs öllum fjölskyldum frítt á ævintýrasýningu í Sláturhúsinu  frá kl. 14:00 – 18:00. Sýningin er samvinnuverkefni Menningarmiðstöðvar og Listahátíðar Reykjavíkur.

Þá vill Fljótsdalshérað hvetja foreldra og forráðamenn til að taka sér tíma og eiga góða samverustund með börnunum sínum á sunnudaginn, t.d. til útivistar.

Nálægð við náttúruna býður upp á óþrjótandi möguleika til afþreyingar og útivistar.
Áhugaverðir staðir eru fjölmargir í sveitarfélaginu s.s.
• Hallormsstaðaskógur með viðkomu í Atlavík eða Stekkjarvík (neðan við þjóðveg á milli Freyshóla og Hafursár) en þar er góð grillaðstaða með borðum og bekkjum.
• Trjásafnið í Hallormsstað
• Útivistarsvæðið í Selskógi  þar sem eru góðir göngustígar og leiktæki
• Fardagafoss
• Stórurð
• Hjóla og göngustígar vítt og breytt um Egilsstaði og yfir í Fellabæ
• Ýmsar gönguleiðir. Kort yfir gönguleiðir er hægt að nálgast á heimasíðu Fljótsdalshéraðs á slóðinni www.fljotsdalsherad.is – Ferðamenn – Kort – Gönguleiðir.