Í bókun bæjarstjórnar koma fram hörð mótmæli gegn niðurskurðartillögum útvarpsstjóra sem gengu meðal annars út á að hætta svæðisbundnum útsendingum Ríkisútvarpsins á landsbyggðinni og skoraði bæjarstjórn á að sú ákvörðun yrði endurskoðuð. Bæjarstjórn segist í bókuninni sýna því skilning að á tímum sem þessum þurfi að taka erfiðar ákvarðanir en bendir hins vegar á að Ríkisútvarpið hafi ríka skyldu til þess að þjónusta alla landsmenn. Svæðisbundnar útsendingar hafi sannað gildi sitt á undanförnum árum og fréttaflutningur af landsbyggðinni sé mikilvægur sem og kynning á menningarstarfi þar og mannlífi. Bæjarstjórn bendir á að það sé mikil afturför og veruleg skerðing á þjónustu að hætta útsendingum. Svæðisútvarpið hafi aflað verulegra auglýsingatekna með útsendingum sínum og því sé þessi ákvörðun lítt skiljanleg sem sparnaðaraðgerð. Bæjarstjórn kallar svo eftir enn frekari rökum og útreikningum á því hversu ákvörðun þessi muni skila í beinum niðurskurði Ríkisútvarpsins. Að lokum segir bæjarstjórn Fljótsdalshéraðs að þau telji að þessi ákvörðun hafi verið fljótfærnisleg og komi einungis til með að veikja stofnunina.
Í gær, 4. desember, tilkynnti útvarpsstjóri Páll Magnússon að Ríkisútvarpið ohf. hefði ákveðið að draga til baka áform um að leggja af svæðisbundnar útsendingar frá Akureyri, Egilsstöðum og Ísafirði. Hann hafði á orði að síðustu daga hefðu fjölmargir hollvinir svæðisútvarpana hvatt til þess að ekki yrði gripið til þessara sparnaðaraðgerða. Einnig kom fram í máli hans að engin þeirra ráðstafana sem gripið hafi verið til vegna niðurskurðar hefði fengið eins sterk viðbrögð og hugmyndin um að leggja útsendingar svæðisútvarpana niður.