Samgönguvika 2020 – Veljum grænu leiðina

Í gær, á Degi íslenskrar náttúru, hófst Evrópsk samgönguvika. Í ár er yfirskrift samgönguvikunnar „Veljum grænu leiðina“ en um er að ræða samevrópskt átak sem hvetur til vistvænna samgangna.

Markmið vikunnar er að kynna íbúum í þéttbýli samgöngumáta sem allt í senn eru vistvænir, hagkvæmir og bæta heilsu fólks um leið og þeir hafa jákvæð áhrif á umhverfi og andrúmsloft.

Undanfarin ár hefur valkostum til að ferðast milli staða á vistvænan hátt fjölgað til muna sem endurspeglast í auknum fjölda þeirra sem velja að ferðast um með öðrum hætti en einkabílnum.

Þannig velja æ fleiri grænu leiðina í sínum daglegu samgöngum og í ár verður sjónum beint sérstaklega að þeirri þróun.

Að þessu sinni verður Samgönguvika sérstaklega áberandi á samfélagsmiðlum þar sem ekki verður efnt til viðburða sem kalla á að fólk safnist saman. Meðal annars getur fólk tekið könnun á netinu undir yfirskriftinni „Hvaða samgöngukrútt ert þú?“ en henni er ætlað að benda á gamansaman hátt á vistvæna valkosti við einkabílinn þegar kemur að daglegum samgöngum.

Á Fljótsdalshéraði er kjörið að nýta vistvænar samgöngur innan þéttbýlisins og fá þannig hreyfingu, auka umferðaröryggi og minnka kolefnissporið.

Á síðasta degi samgönguvikunnar, þann 22. september, ætlum við að HVÍLA alla BÍLA í þéttbýlinu og ganga, hjóla eða nota strætó til að komast í skóla og vinnu.

Það sem við getum gert til að taka þátt í samgönguviku er til dæmis:

• - Athuga hvernig samgöngukrútt við erum og deila á samfélagsmiðlum.
• - Ganga, hjóla eða taka strætó til að komast leiðar okkar.
• - Hvetja aðra til að nýta vistvæna ferðamáta, t.d. með því að bjóðast til að verða samferða í skólann eða vinnuna.
• - Kíkja á leiðakerfi strætó, sem er ókeypis innan þéttbýlis Egilsstaða og Fellabæjar, til að athuga hvort það hentar þér kannski að nýta strætó einhverja daga.
• - Mældu hversu langt þú þarft að fara í skóla eða vinnu og taktu ákvörðun um það hvernig er best, hagkvæmast og umhverfisvænast að ferðast þessa leið. 
• - Hvíldu bílinn allavega á Bíllausa daginn, 22. september.

Virkjum vöðvana og veljum grænu leiðina.