Bæjarráð Fljótsdalshéraðs

Guðlaugur Sæbjörnsson fjármálastjóri sat fundinn undir þessu lið og fór yfir ýmsar tölur úr rekstri síðasta árs og veitti upplýsingar um stöðu og horfur í rekstri sveitarfélagsins.

Fram kom hjá bæjarstjóra að fyrirspurn hefur borist frá fasteignasölu um húsnæðið að Einhleypingi 1. Bæjarráð samþykkir að fela bæjarstjóra að ræða þessi mál frekar við framkvæmdastjóra HEF, áður en umræddri fyrirspurn verður svarað.

Björn kynnti erindi frá Björgunarsveitinni Héraði varðandi möguleika á samningi við sveitarfélagið um afnot af íþrótta- og þrekaðstöðu. Bæjarráð samþykkir að heimila bæjarstjóra að fara í viðræður við forsvarsmenn björgunarsveitarinnar um málið.

Björn Ingimarsson bæjarstóri lagði fram gögn sem hann tók saman um viðbyggingu við leikskólann Hádegishöfða, en á sínum tíma var búið að hanna þar stækkun leikskólans.

Eftirfarandi tillaga lög fram:
Bæjarráð felur bæjarstjóra, fræðslufulltrúa og leikskólastjóra Hádegishöfða að fara yfir þessi gögn og endurmeta þau miðað við núverandi forsendur.

Samþykkt samhljóða með handauppréttingu.

Við umræður um fundargerð atvinnumálanefndar sat Óðinn Gunnar Óðinsson íþrótta- menningar og atvinnufulltrúi fundinn.

Fundargerðin staðfest.

Lögð fram til kynningar, fundargerð 15. fundar Samtaka orkusveitarfélaga, sem haldinn var 9. desember 2013.

Lögð fram til kynningar, fundargerð byggingarnefndar hjúkrunarheimilis frá 8. janúar 2014.

Lögð fram fundarboð vegna aukaaðalfundar Héraðsskjalasafns Austfirðinga 30. janúar 2014. Bæjarstjórn hefur þegar skipað aðal- og varamann til að fara með umboð og atkvæði Fljótsdalshéraðs á fundinum.

Lagt fram bréf frá Alþýðusambandi Íslands, dagsett 13.janúar 2014, þar sem skorað er á sveitarstjórnir að halda aftur af gjaldskrárhækkunum.

Eftirfarandi tillaga lögð fram.
Bæjarráð samþykkir að fallið verði frá fyrirhugaðri 2,5 % hækkun sorphirðu- og sorpförgunargjalda og 3,2% vísitöluhækkun á sorp sem komið er með til söfnunarstöðvar. Sorpgjöld verða því óbreytt frá fyrra ári.
Fjármálastjóra jafnframt falið að útbúa viðauka við fjárhagsáætlun ársins 2014, sem tekur mið af þessari breytingu og leggja fyrir næsta bæjarráðsfund.
Umrædd hækkun á sorpgjöldum var eina gjaldskrárhækkunin sem bæjarstjórn Fljótsdalshéraðs hafði ákveðið fyrir árið 2014 og telur bæjarráð mikilvægt að samstaða náist um að halda aftur af verðhækkunum til að halda verðbólgunni niðri.

Lagður fram tölvupóstur frá Alþingi, dagsettur 6. janúar 2014, með umsagnarbeiðni um tillögu til þingsályktunar um flutning stjórnsýslu um málefni hreindýra.

Eftirfarandi tillaga lögð fram:
Bæjarráð lýsir stuðningi við þær tillögur sem þar koma fram um að málefni er varða hreindýr verði aftur flutt til hreindýraráðs og starfsemi þess verði þar með efld á Egilsstöðum og Austurlandi. Stjórnun þessara mála hlýtur að byggja mikið á staðbundinni þekkingu og reynslu og því mikilvægt að yfirumsjón þeirra sé sem næst dvalar- og veiðisvæði hreindýranna.

Samþykkt samhljóða með handauppréttingu.

Lagður fram tölvupóstur frá nefndarsviði Alþingis, dagsettur 6. janúar 2014, með umsagnarbeiðni um tillögu til þingsályktunar um stofnun Hofsjökulsþjóðgarðs.

Bæjarráð mun ekki veita sérstaka umsögn um þingsályktunartillöguna.

Fram kom að ákveðið hefur verið að halda sérstakan vinnufund um málið þann 30. janúar nk. kl. 16:00. Þangað verða boðaðir aðal- og varamenn í bæjarstjórn.
Málið kemur síðan aftur til afgreiðslu á næsta fundi bæjarráðs.

Lögð fram drög að samþykkt um hænsnahald innan þéttbýlis á Fljótsdalshéraði sem hafa verið í vinnslu um skeið.

Bæjarráð samþykkir að senda drög að samþykktinni til HAUST til yfirlestrar og umsagnar.