Ungmennaráð Fljótsdalshéraðs

Ungmennaráð þakkar 10. bekkingum kærlega fyrir frábærar hugmyndir og kennurum Egilsstaðaskóla fyrir að hvetja nemendur til að hugsa um leiðir til að gera bæinn okkar enn betri.

Lagt er til að umhverfis- og framkvæmdanefnd taki sérstaklega til umfjöllunar tillögur að aukinni afþreyingu í Selskógi, brú innan svæðisins og stækkun útivistarsvæðis, t.d. með tilliti til fjallahjólabrautar.

Þá leggur Ungmennaráð til að atvinnu- og menningarnefnd skoði tillögur að uppbyggingu starfsemi sem tengist Lagarfljótinu og Lagarfljótsorminum.

Samþykkt samhljóða með handauppréttingu.

Aðalheiður Sjöfn Helgadóttir kynnti ferð sína á ráðstefnuna Sýnum karakter, sem haldin var á vegum UMFÍ og ÍSÍ í lok september. Á ráðstefnunni var ætlunin að varpa ljósi á hvers vegna ungmenni hætta þátttöku í íþróttum og hvers vegna þátttaka barna af erlendum uppruna í íþróttastarfi er minni.

Ungmennaráð Fljótsdalshéraðs leggur til að unnið verði áfram í málinu, en það hefur legið í dvala í langan tíma. Jafnframt leggur ráðið til að næsta nágrenni Egilsstaðaskóla verði skoðað með það fyrir augum að færa rampana þangað og gera þar góða aðstöðu fyrir reiðhjólafólk og hjólabrettaiðkendur.

Samþykkt samhljóða með handauppréttingu.

Ungmennaráð þakkar íþrótta- og tómstundanefnd fyrir góð viðbrögð við beiðni um endurskoðun gjaldskrár Íþróttamiðstöðvar fyrir ungmenni, sem tekin var fyrir á fundi nefndarinnar 11. október 2017. Óskar Ungmennaráð jafnframt eftir því að fá að taka áfram þátt í útfærslu gjaldskrárinnar.

Samþykkt samhljóða með handauppréttingu.

Ungmennaráð Fljótsdalshéraðs hvetur ungt fólk með kosningarétt til að nýta hann í komandi Alþingiskosningum.

Þá felur ráðið starfsmanni að senda spurningalista til allra framboða í Norðausturkjördæmi og koma svörum á heimasíðu sveitarfélagsins og Facebooksíðu Ungmennaráðs til upplýsingar.

Samþykkt samhljóða með handauppréttingu.

Ungmennaráð Fljótsdalshérað sat, ásamt ungmennaráði Fjarðabyggðar, námskeiðið Sýndu hvað í þér býr í dag, fimmtudaginn 19. október 2017, en námskeiðið er haldið á vegum UMFÍ.

Tókst námskeiðið vel og þakkar Ungmennaráð Fljótsdalshéraðs UMFÍ fyrir að standa fyrir námskeiðinu og leggur til að það verði haldið árlega fyrir nýja meðlimi ráðsins.

Samþykkt samhljóða með handauppréttingu.

Almar Aðalsteinsson kynnti Landsmót Samfés, sem haldið var á Egilsstöðum í byrjun október, en Landsmótið tókst með miklum ágætum. Þá var Landsþing ungs fólks haldið sömu helgi.

Ungmennaráð Fljótsdalshéraðs fagnar því að samkomur sem þessar séu haldnar í sveitarfélaginu og þakkar Árna Pálssyni, Reyni Hólm Gunnarssyni og starfsfólki Samfés kærlega fyrir frábæra skipulagningu og utanumhald.

Samþykkt samhljóða með handauppréttingu.