Ungmennaráð Fljótsdalshéraðs

Rætt um verkefnið Plastpokalaust Fljótsdalshérað 2018 og bæjarfulltrúar greindu frá framvindu þess. Ungmennaráð ítrekaði áhuga á aðkomu að verkefninu og voru hvött til þess að sýna frumkvæði í málinu.

Ungmennaráð lagði fram spurningar varðandi tíðni ferða, aðgengi og endurskoðun almenningssamgangna.
Bæjarfulltrúar árétta að áætlun um almenningssamgöngur er í stanslausri endurskoðun. Ungmennaráð lýsir yfir áhuga á því að hafa aðkomu að slíkri vinnu.

Umræður um Vegahúsið, starfsemi þess og framtíð. Fulltrúar ungmennaráðs og Vegahúss fara á Landsþing ungmennahúsa á Akureyri í byrjun mars.

Ungmennaráð veltir upp spurningum um hvort og þá hvernig sveitarfélagið hyggst beita sér fyrir geðheilbrigðisþjónustu fyrir ungt fólk, t.d. í ljósi verri líðan framhalds- og háskólanema um land allt og ekki síst vegna hárrar sjálfsvígstíðni ungs fólks á Austurlandi.
Bæjarstjóri nefndi innleiðingu "sænska módelsins" í sveitarfélaginu og hvernig það mögulega nýtist börnum og ungmennum í þessu samhengi. Bæjarfulltrúar benda á aukna sálfræðiþjónustu hjá HSA, sem nýtist grunnskólum sveitarfélagsins. Vangaveltur um ástæður vanlíðan ungmenna og hvað hægt er að gera í forvarnaskyni.